Fohrrad-Warksteed in de Fambossler Kantstraat 4 (Hans Möller)
De Willkommensgrupp von de Evangelischen Kark in Bad Fallingbostel geev dat al bevör ab September 2015 de veelen Flüchtlinge in Düütschland ankeemen. Siet Dezember 2014 wöörd sik um de Flüchtlinge kümmert, de na Fambossel towiesen wöörn. Bi een Drapen weer een Thema, dat de Flüchtlinge veel Tied brukt vör de langen Wege üm na Amt, to School, na ‘n Doktor oder to ‘n Inköpen to komen. Düt weer de Anlass för Margret Sandkuhl un Hans Schrader för de Gründung vun een Fohrrad-Warksteed.
De Stadt Bad Fambossel hett de Rüümlichkeiten to Verfügung stellt. Dat wärn Kellerrüüme in de Kantstraat 4 in Stadtdeel Wienbarg, wo een Sozialarbeiter al mol een Fohrrad-Warksteed bedreben har. Mit de Restbestände weer een Grundlage dar. Hölpers för de Warksteed hebbt sik bi Margret und Hans meldt. Am 13. Mai 2015 hett de Fohrrad-Warksteed de Kellerdör losmakt und weer vun Anfang an goot besöcht. Dat Warksteed-Projekt hal sik in de hiesige Bevölkerung gau rümsnakt. De Spendenbereitschaft mit gebrukte Fohrrööd wär groot, dat weer dull. Mit de Tied kunnen wi de Rüümlichkeiten mit Farv un Licht ook fründlicher gestalten un us ok mehr Warktüüch anschaffen.
Jümmers Middeweken vun Klock 10 bit Klock 12 worrn in de Warksteed Fohrrööd instandsett. De repareerten Fohrrööd hebbt wi nur an Flüchtlinge för lüttes Geld afgeven. Wi wulln keen Konkurrenz för de hiesigen Handwerker ween. Junge Flüchtlinge hebbt uns ok regelmäßig holpen un wi weern truurig, wenn eenige Familien hier nich blieben dörven un in eere Heimat torüchmüssen. För de Flüchtlingskinner weer dat bi uns in de Warksteed spannend un se hebbt lehrt, een Rad heeltomoken. Dat hett eer und ok uns veel Spass mokt. Se müssen in Keller nur Düütsch snaken. De Öffnungstieden wurn later vun Klock 15.30 bit Klock 18.00 ännert. Veele Flüchtlinge weern vörmittags in School un Kurse inbunn.
Mit Koffie und Kekse hebbt uns de Froonslüüd versorgt, de in de Kantstraat eene Neihstuuv für de Flüchtlingsfroon inricht hebbt. Wi hebbt uns jümmer darto freut. Grillfeste wurn fiert und wi hebbt bosselt rund üm de Kantstraat. Dor wor man wies, woveele Kulturen in Stadtdeel Wienbarg left: Lüd ut Georgien, Syrien, Pakistan, Albanien. All seten wi tosomen un leten uns dat good gahn.
Vun Mai 2015 bit Mitte Juni 2017 sünd öber 100 Fohrrööd instandsett worn. De Bedarf an eenfache Fohrrööd weer deckt, de Ansprüche grötter un de Ersatzdeele ümmer dürer. In Juni 2017 güng dat letzte Fohrrad an een Flüchtling und denn wer Schluss. Allns wat öwerbleben is, hebbt wi an de Jugendhilfeinrichtung “Vier Linden“ wietergeven.
De Afschied is uns allen schwoor fulln.